Segja má að George Hollingsworth hafi fengið vægt áfall þegar honum var litið inn í bílskúrinn við heimili sitt á dögunum.
Þegar George, sem er búsettur í Marion í Indiana í Bandaríkjunum, var litið inn í skúrinn sá hann greinileg merki þess að brotist hefði verið inn í hann. Í fljótu bragði var ekki ljóst hvort einhverju hefði verið stolið, enda hafði George ekki beinlínis lagt mikla áherslu á að halda skúrnum snyrtilegum.
Sú staðreynd að hurðarkarmurinn var brotinn og stór og mikill peningaskápur í skúrnum hafði fallið um koll var þó nóg til að vekja grunsemdir um að einhver hefði farið inn í skúrinn.
George átti að líkindum von á flestu öðru en að finna lík karlmanns undir peningaskápnum. Um er að ræða stóran, gamlan og mjög þungan skáp sem vegur rúm 400 kíló. Talið er að innbrotsþjófurinn hafi ætlað að brjótast inn í skápinn, en það hafi ekki farið betur en svo að skápurinn féll um koll og á manninn sem varð undir.
Á vettvangi fannst tjakkur sem hafði verið notaður til að losa skápinn frá gólfinu. Lögregla segir að þjófurinn látni hafi verið 28 ára karlmaður að nafni Jeremiah Disney.
„Í sannleika sagt hefði ég frekar viljað að hann hefði stolið einhverju frá mér en deyja með þessum hætti,“ segir George í samtali við Fox59 í Bandaríkjunum.