Sky sagði rétt í þessu að lögreglan hafi nú staðfest að einn hið minnsta hafi verið skotinn til bana í miðborg Utrecht í morgun. Eins og DV skýrði frá þá var tilkynnt um skothríð í sporvagni í miðborginni klukkan 10.45 í morgun. Sögum ber ekki saman um hvort einn eða tveir menn hafi verið að verki en ljóst er að skotið var á fólk af handahófi. Árásarmaðurinn eða árásarmennirnir komust undan.

Fjölmennt lögreglulið leitar þeirra nú. Hollenska ríkisstjórnin var boðuð til neyðarfundar í morgun. Öryggisráðstafanir hafa verið hertar í öllum helstu borgum landsins.

Hryðjuverkadeild lögreglunnar var send á vettvang í Utrecht en ekki er talið útilokað að um hryðjuverk sé að ræða.

Skólum í borginni hefur verið fyrirskipað að halda börnum innandyra og læsa öllum inngöngum.

Ríkisstjórn landsins hefur ákveðið að hækka hættustig vegna hryðjuverka á hæsta stig í Utrecht og nágrenni.

Hollenskir fjölmiðlar segja að einn sé látinn og sjö, hið minnsta, særðir.