Nítján ára stúlka, Tay‘lor Smith, hefur játað fyrir dómi að hafa hrint sextán ára vinkionu sinni, Jordan Holgerson, fram af brú í Moulton Falls skammt frá Vancouver.

Atvikið náðist á myndband og er óhætt að segja að það sé býsna óhugnanlegt áhorfs. Stúlkurnar voru í hópi vina sem var að leik á brúnni.

Jordan hugðist stökkva en hætti við á síðustu stundu. Áður en Jordan náði að komast aftur yfir brúarhandriðið ýtti Tay‘lor henni niður og var fallið rúmir átján metrar. Jordan lenti í ánni fyrir neðan en slasaðist talsvert við fallið; hún braut sex rifbein en auk þess féllu lungu hennar saman.

Tay‘lor átti yfir höfði sér allt að eins árs fangelsi vegna málsins. Verjandi hennar komst að samkomulagi við saksóknara um að ekki verði farið fram á fangelsisdóm yfir henni. Eru líkur á að hún verði þess í stað dæmd til samfélagsþjónustu og til að vera með ökklaband í óákveðinn tíma.

Í viðtali eftir atvikið í fyrrasumar sagði Tay‘lor að hún hafi ekki hugsað dæmið til enda þegar hún ýtti vinkonu sinni niður. Hún hafi ekki ætlað sér að meiða Jordan og þá kvaðst hún sjá mikið eftir gjörðum sínum.