Hætt er við að margir Bretar muni reka upp stór augu og verða ansi ósáttir um næstu mánaðarmót. Óánægjunnar mun væntanlega gæta sérstaklega í unglingaherbergjum um allt land. Ástæðan er að um mánaðarmótin verður lokað fyrir óheftan aðgang að klámi á netinu fyrir þá sem eru yngri en 18 ára.

Til að komast inn á klámsíður í framtíðinni þurfa notendur að sanna aldur sinn með skilríkjum. Þetta er ákvæði nýrra laga um klám á netinu.

Í nýrri könnun YouGov kemur fram að stór hluti Breta veit ekki af þessari breytingu. 76 prósent aðspurðra höfðu enga vitneskju um lögin. En það þarf kannski ekki að koma á óvart að könnunin sýndi einnig að þeim mun oftar sem fólk notar klámsíður á netinu, þeim mun meiri líkur eru á að það hafi heyrt um þetta bann.

Lögin hafa í för með sér að klámsíður, sem vilja starfa á Bretlandseyjum, verða að tryggja að enginn yngri en 18 ára geti komist inn á þær. Til að sanna aldur sinn getur fólk til dæmis notað greiðslukort, ökuskírteini eða annað sem staðfestir aldur viðkomandi.

Auk þess verður hægt að kaupa einhverskonar aðgangskort í verslunum en það verður aðeins selt gegn framvísun skilríkja, svona svipað og þegar áfengi og tóbak er selt.

Lögin hafa sætt nokkurri gagnrýni. Þar á meðal frá samtökunum Open Rights sem vinna að réttindamálum netnotenda. Þau telja að lögin veiti klámsíðunum alltof mikil völd og þær fái alltof miklar upplýsingar. Það geti haft í för með sér að gagnaþjófnaður frá klámsíðum verði til þess að allir geti séð hverjir hafi verið að nota þær þar sem persónuupplýsingar verða skráðar þar.