Þjófar sem brutust inn í kirkju Maríu Magdalenu í bænum Castelnuovo Magra á Ítalíu töldu sig hafa komist í feitt þegar þeir stálu málverki í kirkjunni.

Verkið, sem heitir Krossfestingin og er eftir Pieter Brueghel yngri, hefur lengi hangið uppi á vegg í umræddri kirkju – gestum og gangandi til augnayndis. Verkið var málað á 17. öld og er það metið á um 400 milljónir króna.

Sá orðrómur hafði verið á kreiki að þjófagengi væri að undirbúa þjófnað á verkinu. Lögregla brást því við – kannski sem betur fer – og tók verkið niður og setti eftirlíkingu af verkinu upp í staðinn. Það borgaði sig því skömmu síðar brutust þjófarnir inn og stálu verkinu. Innbrotið átti sér stað síðastliðinn miðvikudag.

Enginn hefur verið handtekinn vegna málsins en öryggismyndavélar, sem var komið upp af lögreglu um það leyti sem verkinu var skipt út, náðu myndum af tveimur mönnum á Peugeout-bifreið. Lögreglu grunar hverjir voru að verki.

Síðast var reynt að stela verkinu árið 1981 og þá tókst þjófunum ætlunarverk sitt. Lögregla fann verkið þó nokkrum mánuðum síðar. Verkið hefur verið í eigu kirkjunnar undanfarin hundrað ár eða svo.