Alþjóðastríðsglæpadómstóllinn hefur dæmt Radovan Karadžić, fyrverandi leiðtoga Bosníu-Serba, í lífstíðarfangelsi fyrir þjóðarmorð á árunum 1992 til 1995. Reuters greinir frá en dómurinn var kveðinn upp eftir hádegi.

Karadžić var dæmdur í 40 ára fangelsi árið 2016 en áfrýjunardómstóllinn sagði að refsingin þá hefði verið of léttvæg í ljósi brotanna sem hann var sakfelldur fyrir.

Í stríðinu í Júgóslavíu var Karadžić fundinn sekur um morð, að ráðast á óbreytta borgara, og hryðjuverk með umsátri sínu í Sarajevo, höfuðborg Bosníu á meðan stríðið stóð yfir í landinu á árunum 1992 til 1995. Í stríðinu dóu um 100.000 manns.

Mál Karadžić er eitt síðasta skrefið í málsmeðferðum tengdum stríðinu í Júgóslavíu. Karadžić var ákærður ásamt Ratko Mladic árið 1996, en þeir sluppu undan réttvísinni þar til Karadžić var handtekinn í Belgrad í Serbíu árið 2008. Mladic var síðar handsamaður og dæmdur í lífstíðarfangelsi í nóvember 2017.