Fyrir 15 árum fannst hálfnakið konulík í á í Pennine Way í Yorkshire Dales á Englandi. Ekki var hægt að slá því föstu hvað hefði orðið konunni að bana. 2007 úrskurðaðið dánardómsstjóri að málið væri óleyst og ekki hægt að kveða upp úr um dánarorsök konunnar. Auk þess var ekki hægt að bera kennsl á konuna.

En nú hefur dregið til tíðinda í málinu því kennsl hafa verið borin á konuna. Taílensk yfirvöld hafa staðfest að fingraför konunnar séu fingraför Lamduan Seekanya. Lögreglan er nú að rannsaka málið á nýjan leik og þá sérstaklega hvort að breskur eiginmaður hennar, David Armitage, 55 ára, beri ábyrgð á láti hennar.

Armitage býr í Taílandi. Blaðamenn The Sun höfðu uppi á honum þar og ræddu málið við hann. Hann þvertók fyrir að hafa banað eiginkonu sinni. Hann sagðist vita af málinu en hafi ákveðið að halda áfram að lifa sínu lífi og láta þetta ekki hafa áhrif á sig.

Seekanya var jarðsett í ómerktri gröf í kirkjugarðinum í Horton-in-Ribblesdale. Á minningarsteini, sem er í hæðunum ofan við bæinn, stendur:

„Konan á hæðinni. Fannst 20. september 2004. Nafn óþekkt. Hvíldu í friði.“

Lögreglan í Yorkshire sagði á síðasta ári að hún teldi að konan væri frá Taílandi og hafi komið til Englands til að giftast þarlendum manni.

Talið er að hún hafi gifst Armitage í Taílandi í janúar 1991 og að þau hafi síðar flutt til Englands og eignast tvö börn. 2003 fluttu þau inn til foreldra Armitage en fljótlega var vinum og ættingjum sagt að Seekanya hefði horfið.