Bræðurnir Brian og Patrick Lanigan eru nágrannar Natalie Blair, eldri konu sem býr í New Jersey í Bandaríkjunum. Hún er nýrnaveik og þarf reglulega að fara í blóðskilunarvél á sjúkrahúsi. Í byrjun mánaðarins snjóaði mikið kvöld eitt og nótt eina í New Jersey. Natalie þurfti að mæta í blóðskilunarvélina næsta dag og því var mikið undir að hún kæmist en hún óttaðist að snjór og tilheyrandi ófærð myndi gera að verkum að hún kæmist ekki í vélina. Það gat ógnað lífi hennar.
Brian, sem starfar sem sjúkraflutningamaður, hafði mokað innkeyrsluna hjá Natalie nokkrum dögum áður þegar mikið snjóaði en hann var á vakt þetta kvöld og nótt og gat því ekki mokað. Það þýddi því að unglingsbróðir hans, Patrick, þurfti að tryggja að Natalie kæmist á sjúkrahúsið.
Patrick taldi það ekki eftir sér og hóaði í nokkra vini sína í gegnum samfélagsmiðla. Þeir mættu síðan að húsi Natalie klukkan 4.30 um nóttina og hófust handa. Á hálfri klukkustund mokuðu þeir innkeyrsluna og gerðu Natalie þannig kleift að komast á sjúkrahúsið í blóðskilunarvélina. Hún trúði vart eigin augum þegar hún vaknaði og sá að það var fært fyrir bíl hennar út úr innkeyrslunni.
CNN skýrði frá þessu.