Bresk fyrirtæki undirbúa sig nú mörg hver af kappi fyrir útgöngu Breta úr ESB, hvenær sem af henni verður. Einn stærsti birgi landsins af salernispappír og eldhúspappír er undir það búinn að ekki náist samningur um útgönguna og því verði um svokallaða „harða útgöngu“ að ræða.

Samkvæmt frétt The Guardian hefur fyrirtækið Wepa sankað að sér miklu magni af salernis- og eldhúspappír á undanförnum mánuðum til að geta séð Bretum fyrir þessum nauðsynjum. Nú er fyrirtækið með um 600 tonn af slíkum pappír á lager en það eru um 3,5 milljónir rúlla.

Haft er eftir Mike Docker, forstjóra Wepa í Bretlandi, að fyrirtækið sé undir það búið að miklar tafir verði á tollafgreiðslu til landsins í kjölfar Brexit og því hafi það sankað að sér miklum birgðum.

Fyrirtækið hefur einnig ákveðið að leigja skip til að flytja klósettpappír og eldhúspappír beint frá Napólí á Ítalíu til Swansea í Wales í stað þess að treysta á flutningabíla sem flytja varning á milli Calais og Dover.