Á áttunda og níunda áratugnum leituðu mörg pör til bandaríska frjósemislæknisins Donald Cline á stofu hans í Indiana. Þar aðstoðaði hann pörin með því að nota gjafasæði til að frjóvga egg kvennanna. Sæðið var frá nafnlausum gefendum. Eða það hélt fólkið að minnsta kosti.

En nú er komið í ljós að svo var ekki alltaf því Cline taldi ekki eftir sér að nota eigið sæði án þess að upplýsa viðskiptavini sína um það. Nú hefur verið staðfest að hann er faðir 48 uppkominna barna sem eiga mæður sem nutu aðstoðar Cline. Ekki er talið ósennilegt að börnin séu mun fleiri.

Cline hefur játað að hafa notað eigið sæði margoft á þessum tveimur áratugum.

Málið komst upp fyrir þremur og hálfu ári þegar blóðflokkur Cline kom margoft upp í dna-skrá. Í hverju tilfelli sást að mæðurnar, sem í hlut áttu, höfðu verið viðskiptavinir Cline. Það þurfti því aðeins að leggja saman tvo og tvo til að átta sig á að hann hafði notað eigið sæði til að frjóvga konurnar.

Í fyrstu var talið að hann hefði eignast 20 börn með þessum hætti en nú er talan komin upp í 48.

Mörg þessara barna hafa tekið upp samband og hittast reglulega og nota samfélagsmiðla óspart til að halda sambandi.

Cline er á lífi en hann er orðinn áttræður. Hann þarf ekki að óttast hinn langa arm laganna því í Indiana eru engin lög sem banna svona nokkuð og því er hann laus allra mála, lagalega séð. En hins vegar má velta því upp hvort siðferðislegar spurningar leiti ekki á marga vegna málsins.