Svo virðist vera sem galli við hönnun á ákveðnum árgerðum bíla af tegundinni Ford Explorer hafi valdið veikindum hjá eigendum.
Fréttavefur Bloomberg greindi frá þessu um helgina og vísar til upplýsinga þess efnis að hátt í þrjú þúsund eigendur þessara bíla hafi kvartað. Um er að ræða fimmtu kynslóð Explorer, bíla sem framleiddir voru á árunum 2010 til 2018.
Veikindin sem fólk hefur kvartað yfir eru af ýmsum toga; höfuðverkir, ógleði, svimi og í einhverjum tilfellum skert meðvitund eða meðvitundarleysi.
Svo virðist vera sem vandinn eigi rætur sínar að rekja til galla í pústkerfinu. Útblástur eigi leið inn í bílinn og hann valdi kolsýringseitrun. Bílar af þessari gerð hafa meðal annars verið notaðar hjá löggæslustofnunum í Bandaríkjunum og hefur eitrun mælst í lögregluþjónum sem hafa kvartað undan einkennum. Að því er fram kemur í frétt Bloomberg hafa ökumenn brugðið á það ráð að fá sér skynjara í bílinn sem nemur kolsýring í farþegarýminu.
Bandaríska umferðaröryggisstofnunin, NHTSA, er meðvituð um málið og hefur verið með það til skoðunar í nokkurn tíma. Þessar tegundir bíla hafa þó ekki verið innkallaðar, en í frétt Bloomberg kemur fram að það sé ekki útilokað að það gerist á næstunni. Það yrði þó dýrt fyrir Ford því innkalla þyrfti rúmlega milljón bíla. Kostnaðurinn við það myndi hlaupa á hundruðum milljóna Bandaríkjdala.