Árum saman hefur fjöldi katta horfið á dularfullan hátt á ákveðnu svæði í Rønne á Borgundarhólmi í Danmörku. En nú hefur lögreglunni loksins tekist að leysa málið. Góðu fréttirnar eru að sumir kattanna eru hugsanlega á lífi en slæmu fréttirnar eru að aðrir eru hugsanlega dauðir og að erfitt getur orðið fyrir eigendur lifandi katta að fá þá aftur.

Samkvæmt frétt TV2 Bornholm þá er það íbúi á svæðinu sem ber ábyrgð á hvarfi kattanna. Hann var svo þreyttur á sífelldum heimsóknum þeirra í garðinn hans, þar sem þeir gerðu þarfir sínar, að hann byrjaði að fanga þá.

Flest bendir til að hann hafi síðan sleppt þeim lausum í skógi utan við bæinn. Af þeim sökum eru líkur á að sumir kattanna séu á lífi en það gæti reynst eigendunum erfitt að finna þá aftur í skóginum og sannfæra þá um að koma með heim, svona ef köttunum fellur lífið vel í skóginum.

Kattaþjófurinn á kæru yfir höfði sér og sekt ef hann verður fundinn sekur um kattaránin.