Þau höfðu leigt hús í gegnum Airbnb. Þegar þangað var komið var tekið upp úr töskum og Andrew, sem starfar við tölvuöryggismál, fór að skanna og leita að þráðlausu netsambandi í húsinu. Til þess notaði hann sérstakan skanna. En skanninn fann ekki bara þráðlaust internet heldur einnig falda myndavél sem sendi beint út frá húsinu.
„Okkur brá mikið. Þetta var hræðileg tilfinning.“
Sagði Nealie í samtali við CNN.
Fjölskyldan setti sig í samband við Airbnb og tilkynnti um málið. Þar á bæ fengust hins vegar engin svör. Andrew hringdi þá í eiganda hússins sem skellti á þegar Andrew spurði hann út í myndavélina. Hann hringdi síðar í Andrew og sagði að myndavélin, sem var í stofunni, væri eina myndavélin í íbúðinni. Hann vildi þó ekki staðfesta að sent væri út í beinni útsendingu. Nealie sagði að fjölskyldunni hafi nú ekki létt neitt sérstaklega við þetta.
CNN hefur eftir henni að þau hafi ekki heyrt neitt frá Airbnb í langan tíma en skyndilega heyrðist frá fyrirtækinu eftir tvær vikur og fengust þá þær upplýsingar að íbúðin væri enn í útleigu í gegnum Airbnb.
Málið tók síðan nýja stefnu þegar fjölskyldan skrifaði um það á Facebook og það fór að vekja athygli. Þá fjarlægði Airbnb leigusalann af síðu sinni. Í svari til CNN sagði Airbnb að fyrirtækið setji „öryggi og friðhelgi“ viðskiptavina sinna ofar öllu, bæði á netinu og utan þess.
Baker-fjölskyldan er enn á ferðalagi og notar enn Airbnb en segist nú vera varkárari en áður.