Nýbökuð móðir á þrítugsaldri í Birmingham berst nú hetjulega við krabbamein eftir að heilbrigðisstarfsmenn sögðu henni að hafa engar áhyggjur, þetta væri aðeins stíflaður mjólkurkirtill.
Vici Keating fann hnúð í brjósti sínu skömmu eftir að fæða dóttur sína. Hún reiknaði fyrst með því að um stíflaðan mjólkurkirtil væri að ræða og læknirinn hennar var sammála jafnvel eftir ómskoðun. Til að hafa vaðið fyrir neðan sig var þó farið fram á frekari rannsóknir. Í kjölfarið kom í ljós að Vici var með alvarlegt brjóstakrabbamein.
Hún mun því gangast undir tvöfalt brjóstnám í næsta mánuði og deilir sögu sinni til að brýna fyrir öðrum konum að skoða á sér brjóstin.
„Ég stressaði mig ekki mikið fyrst þegar ég fann hnúðinn í brjóstinu stuttu eftir að ég fæddi Rey, dóttur mína. Ég gerði bara ráð fyrir að hann tengdist meðgöngunni og læknirinn var sammála mér um að þetta væri að líkindum stíflaður mjólkurkirtill. Til allra hamingju voru frekari rannsóknir framkvæmdar og tóku sýni úr hnúðnum“
Þremur vikum síðar fékk hún tilkynningu um að niðurstöðurnar væru komnar og hún var beðin um að koma upp á sjúkrahús.
„Ég fór einsömul á fundinn þar sem ég gerði ráð fyrir að þetta væri góðkynja hnúður. Mér datt ekki einu sinni í hug að ég fengi krabbameinsgreiningu þetta ung.“
Niðurstaðan var sláandi. Hún var með svokallað þríneikvætt brjóstakrabbamein en slíkt krabbamein svarar engri hormónameðferð. Hún hóf lyfjameðferð rétt fyrir jólin og hefur í dag lokið fyrstu umferð. „Til allrar hamingju halda læknarnir að krabbameinið sé ekki búið að dreifa sér, en það er ekki hægt að fullyrða það fyrr en eftir aðgerðina.“
Hún ákvað að fara í tvöfalt brjóstnám til að minnka líkurnar á að krabbameinið snúi aftur. „Þessi tegund af krabbameini sem ég er með svarar ekki neinni hormónameðferð svo eftir lyfjameðferðina og skurðaðgerðina eru engir frekari möguleikar í boði fyrir mig.“
Vici heldur úti bloggi um baráttuna sem kallast : Sögur af þríneikvæða bobbingnum þar sem hún skrifar um reynslu sína af því að greinast með krabbamein á þrítugsaldri. Með bloggi sínu vill hún brýna fyrir ungum konum að vera vakandi fyrir breytingum á bjórstum sínum og finni þær hnúð að láta þá sérfræðinga skoða þá. Lífið gæti legið undir.
