Svo virðist vera sem sparnaður við viðhald fangelsa í Kaliforníu í Bandaríkjunum hafi komið niður á ástandi þeirra. Fangi einn hefur stefnt fangelsisyfirvöldum í Kaliforníu – hann telur að aðstæðurnar í fangelsinu sem hann dvelur í séu hreinlega óboðlegar. Ef allt er satt og rétt sem fram kemur í stefnunni hefur fanginn mikið til síns máls.
Í frétt AP kemur fram að dæmi séu um að maðkar og mýs hafi dottið úr loftum umrædds fangelsis og lent á borðum þar sem fangarnir borða morgunmat og kvöldmat. Þá mýglekur þak fangelsisins og á því eru stór göt. Fugladrit er meðal annars á veggjum. Mygla hefur gert vart við sig í mörgum fangelsum í Kaliforníu.
Í stefnunni kemur fram að yfirvöld hafi látið undir höfuð leggjast að ráðast í nauðsynlegar úrbætur. Yfirvöld í Kaliforníu hafa eyrnamerkt 260 milljónir dala á næstu fjórum árum sem fara í viðhald fangelsa í ríkinu. Talið er að þessi upphæð muni duga skammt því talið er að um einn milljarð dala þurfi í verkefnið. Í stefnunni er kallað eftir því að ráðist verði í aðgerðir strax.
Í stefnunni kemur fram að í tvígang, í apríl 2018, hafi mýs dottið úr loftum og lent á borðum þar sem fangar borðuðu matinn sinn. Í október síðastliðnum datt maðkur úr loftinu og lenti á matarbakkanum hans. Fangavörður sagði fanganum, Marvin Dominguez, einfaldlega að setjast við annað borð þegar Marvin kvartaði.