Aftonbladet hefur eftir talsmanni lögreglunnar fjölmargir lögreglubílar hafi komið við sögu í nótt þegar reynt var að stöðva akstur unga mannsins. Þegar lögreglunni hafði tekist að stöðva akstur ökumannsins reyndi hann að aka á lögreglumann sem gekk að bíl hans. Annar lögreglumaður skaut þá á Porsche bílinn og hæfði ökumanninn í lærið.
Talsmaður lögreglunnar sagði að aðeins hefði munað um einum metra að ökumaðurinn æki á lögreglumanninn.
Blaðamenn Aftonbladet hafa undir höndum upptöku af atburðinum. Þar sést að Porsche-bíllinn er króaður af á milli tveggja ómerktra lögreglubíla. Lögreglumenn stíga út úr bílunum með skammbyssur sínar á lofti. Þar endar upptakan og ekki sést þegar skotið var á bílinn.
Ökumaðurinn var fluttur á sjúkrahús þar sem lögreglumenn gæta hans nú. Hann er grunaður um morðtilraun. Farþegar í bílnum voru teknir til yfirheyrslu.
Sérstakur saksóknari, sem rannsakar öll mál er tengjast notkun lögreglunnar á vopnum, hefur nú tekið við rannsókn á þeim þætti málsins er varðar notkun skotvopna.