Það eru ekki öll hjónabönd sem endast lengi og hvað þá áratugum saman. Það er auðvitað ekki hversdagslegur viðburður að fólk nái þeim áfanga að hafa verið gift í 82 ár en það gerðist nýlega.

Þau D.W. Williams, 103 ára, og Willie Williams, 100 ára, fögnuðu nýlega 82 ára brúðkaupsafmæli sínu með fjölskyldu sinni og vinum. Þau eru ekki fjarri því að komast í Heimsmetabók Guiness sem elstu hjón heims.

Þau eru frá Norður-Karólínu í Bandaríkjunum. Í umfjöllun Boston 25 News er haft eftir barnabarni þeirra, BJ Williams-Greene, að það sé mikil blessun að sjá þau saman á þessum aldri og að hlutirnir gangi svona vel hjá þeim.

Þau hjónin hafa oft verið spurð hver leyndardómurinn á bak við langt og hamingjusamt hjónaband þeirra sé. Willie Williams telur ekki að það sé flókið:

„Verið góð við hvert annað.“