Frá því í febrúar og þar til í júlí 2016 fór Shane Grice, 19 ára, fimm sinnum til lögreglunnar í Brighton á Englandi og bað um vernd. Það var fyrrum unnusti hennar sem hún óttaðist mikið en hann elti hana á röndum og ofsótti.

Þegar hún bað um aðstoð og vernd í fimmta sinn var hún sektuð um sem nemur 18.000 íslenskum krónum fyrir að eyða tíma lögreglunnar að óþörfu. Í ágúst 2016 fannst hún látin á heimili sínu. Hún hafði verið skorin á háls.

Þegar málið var tekið fyrir dóm kom fram að unnustinn fyrrverandi hafði ráðist á hana á götu úti, skorið á dekkin á bílnum hennar og sett staðsetningarbúnað á bíl hennar. Hann komst einnig yfir lykil að heimili hennar og setti rusl fyrir utan það. Evening Standard skýrir frá þessu.

Nú stendur yfir rannsókn á vinnubrögðum lögreglunnar í málinu. Margir lögreglumenn eru til rannsóknar en rannsakað er hvort þeir hafi gerst sekir um vanrækslu í starfi. Lögreglustjórinn í Sussex hefur beðið fjölskyldu Shana afsökunar en fjölskyldan er að vonum ekki ánægð með frammistöðu lögreglunnar.

„Dóttir okkar leitaði til lögreglunnar en í staðinn fyrir að fá vernd var farið með hana eins og glæpamann. Hún lét lífið vegna lélegrar þjálfunar lögreglumanna, skorts á samúð og slæmra viðhorfa.“

Sögðu foreldrar hennar í samtali við ITV.