Árið 2010 var Esa Teittinen, sem er nú 62 ára, dæmdur í 15 ára fangelsi fyrir að hafa myrt sjötugan vin sinn í baðkari í húsi í Solna í Svíþjóð. Teittinen neitaði alltaf sök, bæði fyrir dómi og á meðan hann sat í fangelsi. Þegar lögreglan sviðsetti atburðarás hins örlagaríka dags á síðasta ári kom í ljós að ekki var hægt að útiloka að vinur Tiettinen hefði drukknað í baðkarinu. Teittinen var þá látinn laus eftir að hafa setið í fangelsi í átta ár.

Í gær var gengið frá samningi um bætur til handa Teittinen vegna málsins. Hann fær 8,25 milljónir sænskra króna í miskabætur og 1 milljón fyrir tekjutap. Í heildina svarar þetta til tæplega 120 milljóna íslenskra króna.

Sænska ríkisútvarpið skýrir frá þessu. Teittinen fékk rúman helming þessarar upphæðar greiddan fyrirfram í nóvember en hann var látinn laus í september.

Upphæðin sem hann fær er að sögn sænskra yfirvalda í samræmi við það sem gerist í málum sem þessum þar í landi. Teittinen hafði krafist 25 milljóna sænskra króna í miskabætur.