Svissnesk stjórnvöld hafa nú lýst því yfir að kaffi sé ekki „skilyrði“ fyrir að fólk komist af. Með þessari yfirlýsingu geta stjórnvöld hætt að eiga neyðarbirgðir af kaffi fyrir þjóðina. Slíkt birgðahald hófst í Sviss á milli fyrri og síðari heimsstyrjaldarinnar og hefur verið við lýði síðan.

Neyðarbirgðunum var ætlað að mæta kaffiþörf landsmanna ef til stríðsátaka kæmi eða ef farsóttir eða náttúruhamfarir stöðvuðu kaffiinnflutning til landsins. Stjórnvöld vonast til að geta hætt að eiga kaffibirgðir 2022 en andstaða við þessar fyrirætlanir fer vaxandi innanlands. Rökin sem færð eru fyrir þessari stefnubreytingu er að kaffi sé nær hitaeiningasnautt og því ekki nauðsynlegt til að tryggja næringu þjóðarinnar.

Nú eiga Svisslendingar 15.300 tonn af neyðarkaffi í geymslum en það dugir þjóðinni í þrjá mánuði.

Endanlega ákvörðun verður tekin um málið í nóvember. BBC skýrir frá þessu.