Ef fólk vill fá nægilegt magn vítamína og steinefna þá á að fá það úr matnum. Þetta er niðurstaða nýrrar rannsóknar. Í henni kemur fram að fæðubótarefni, sem innihalda mikið af kalsíum og D-vítamíni, geti aukið líkurnar á krabbameini og ótímabærum dauða.

NBC News skýrir frá þessu. Fæðubótarefni hafa stundum verið gagnrýnd fyrir að hafa ekki jákvæð áhrif á fólk. En það eru til undantekningar á því eins og flestu öðru. Þar má nefna D-vítamín sem fólki er ráðlagt að taka að vetrarlagi ef það fær ekki nægt sólarljós.

Nýja rannsóknin er bandarísk og tóku 27.000 manns þátt í henni. Í henni voru áhrif fæðubótarefna á borð við vítamín og steinefni rannsökuð. Það voru vísindamenn við Tufts háskólann sem gerðu hana. Niðurstaða þeirra er að nauðsynlegt sé að fá lífsnauðsynleg efni úr fæðunni.

Þeir komust einnig að þeirri niðurstöðu að A-vítamín, K-vítamín og magnesíum og zink draga úr líkunum á ótímabærum dauða. En það þarf að innbyrða þessi efni á náttúrulegan hátt úr fæðu.

„Það er mikilvægt að skilja hvernig efni eins og vítamín og steinefni virka í líkamanum. Gögn okkar sýna að það eru heilsubætandi áhrif af næringarefnum í matvælum sem maður fær einfaldlega ekki úr fæðubótarefnum.“

Segir Fang Fang Zhang, hjá Tufts háskólanum.