Richard Neal, þingmaður demókrata, hefur sent erindi til skattayfirvalda þar sem hann biður um að fá skattaskýrslur Trump fyrir árin 2013 til 2018 afhentar. Demókratar vilja gjarnan komast yfir skattaskýrslurnar til að sjá hvað forsetinn hefur greitt í skatt og hvort hugsanlega sé um hagsmunaárekstra að ræða hjá honum í embætti.
„Ég held að þessi hópur þingmanna sé ekki nægilega gáfaður til að fara í gegnum þær mörg þúsund blaðsíður sem ég vænti að skattaskýrslur Trump séu. Ég giska á að flestir þeirra fylli ekki út eigin skattaskýrslur og ég held að þeir geti það ekki.“
Sagði Sanders í viðtali við Fox News í gær en með þessum orðum sínum vísar hún til þingmanna demókrata. Hún sagði jafnframt að tilraunir demókrata til að fá skattaskýrslurnar væri „hættuleg leið“ en vildi ekki segja neitt um hvort Trump muni biðja skattayfirvöld um að afhenda ekki skýrslurnar. Trump er fyrsti forsetinn í 40 ár sem opinberar ekki skattaskýrslur sínar.
Demókratar hafa boðað að þeir muni leita liðsinnis dómstóla til að fá skýrslurnar afhentar ef skattayfirvöld afhenda þær ekki fyrir 23. apríl næstkomandi. Samkvæmt lögum hefur þingið heimild til að biðja um skattaskýrslur hvers sem er til að kanna skattaupplýsingar viðkomandi. Trump hefur sagt að hann vilji gjarnan opinbera skattaskýrslur sínar en geti það ekki því skattayfirvöld séu með skattamál hans til skoðunar. En skattayfirvöld hafa lýst því yfir að slík skoðun komi ekki í veg fyrir að hann megi opinbera skattaskýrslur sínar.