Hin 29 ára Katie Boumann öðlaðist mikla frægð fyrir nokkrum dögum fyrir þátttöku sína í að ná fyrstu ljósmyndinni af svartholi. Katie fékk mikið lof á samfélagsmiðlum í kjölfar myndarinnar, meðal annars frá bandarísku þingkonunni Alexandriu Ocasio-Cortez.

Fljótlega fóru þó margir að draga verk hennar í efa á samfélagsmiðlum. Netverjar á Reddit, Twitter og Youtube vildu meina að Andrew Chael sé raunverulegi heilinn á bak við verkefnið.

Á þessum miðlum var talað um að Chael hafi skrifað 850.000 línur af kóða af þeim 900.000 sem voru skrifaðar í heildina.

Eftir þetta birti Chael sjálfur færslu á Twitter þar sem hann sagði netverjum að hætta að draga verk Katie í efa.

Chael sagði að verkefnið hefði aldrei getað tekist án samvinnu allra sem stóðu að því og sagði sjálfur að það skipti engu máli hver skrifaði hvaða kóða.

Í frétt Washington Post kemur fram að þetta sé ef til vill enn eitt dæmið þar sem reynt er að gera lítið úr þætti konu á vettvangi sem er þétt setinn af körlum.