Málaði Leonardo da Vinci málverkið af Salvator Mundi, dýrasta málverki heims, eða kannski ekki? Þessu velta ýmsir fyrir sér þessa dagana. Í umfjöllun The Times um málið kemur fram að fram hafi komið staðhæfingar um að National Gallery í Lundúnum hafi meðvitað látið vera að taka mark á mati fjögurra sérfræðinga um hvort verkið sé eftir da Vinci.

Verðmæti málverksins jókst mikið 2011 þegar það var sýnt hjá National Gallery og í sýningarskrá kom fram að það væri verk sem da Vinci hefði gert án aðstoðarmanna.

Í nýrri bók, eftir Ben Lewis, er því nú haldið fram að að National Gallery hafi meðvitað ekki nefnt í sýningarskránni að fjórir listaverkasérfræðingar hafi verið fengnir til að skoða verkið og leggja mat á uppruna þess. Lewis hefur rætt við sérfræðingana. Tveir þeirra segjast telja að da Vinci hafi ekki málað verkið en tveir vildu ekki tjá sig um það. En þetta var ekki nefnt í sýningarskránni og segir The Times að það hafi skipt miklu varðandi verð málverksins.

2005 var það metið á 1.1 milljón dollara en 2017 var það selt á 450 milljónir dollara.

Málverkið er 66 sm á hæð og talið er að da Vinci hafi málað það um 1500. Um er olíumálverk er að ræða og sýnir það Jesú með hægri hönd á lofti, eins og hann sé að blessa eitthvað.