Hann skaut konuna með lásboga. Örin hæfði hana í brjóstið. Örin varð konunni næstum að bana en hún náði að skella útidyrunum eftir að hafa orðið fyrir örinni.
Það vill svo til að eftirlitsmyndavél er við útidyr hússins og á upptöku, sem lögreglan hefur nú birt, sést atburðarásin. Fólkið skiptist á nokkrum orðum en síðan skýtur maðurinn konuna með lásboganum sem var falinn inni í kassanum sem hann hélt á. Því næst hljóp hann á brott.
Lögreglan í Peel, sem rannsakar málið, telur að maðurinn hafi notað kassann til að leyna lásboganum og til að líta út eins og sendill. Á upptökunum sést að hann er með aðra höndina inni í kassanum. Væntanlega hefur hann haldið um gikk lásbogans. Lögreglan telur hugsanlegt að hér hafi verið um leigumorðingja að ræða en ekki er vitað hver hann er eða hver fékk hann til verksins.
Konan særðist mikið enda var ætlunin að verða henni að bana að sögn lögreglunnar. Hún lá á sjúkrahúsi í marga mánuði. Mörg innri líffæri sködduðust í árásinni. Á fréttamannafundi fyrr í vikunni sagði lögreglan að líf konunnar verði aldrei hið sama vegna þeirra alvarlegu áverka sem hún varð fyrir.
Lásbogar á borð við þann sem var notaður til að skjóta konuna eru venjulega notaðir við veiðar á stórum hjartardýrum á borð við elgi.
Lögreglan hefur ekki viljað skýra frá hvað fólkinu fór á milli áður en konan var skotin. Árásarmaðurinn flúði af vettvangi í dökkum sendibíl. Ekki er vitað hvort hann var einn að verki.