Eftir að niðurstöðurnar lágu fyrir var konan, sem er 27 ára, spennt fyrir að afla sér nánari upplýsinga um forfeður sína enda getur verið gaman að grúska í ættfræði og fræðast um uppruna sinn. Það sama átti við um unnusta hennar, 26 ára, en það sem hann uppgötvaði hafði vægast sagt mikil áhrif á líf þeirra.
Maðurinn skýrði nýlega frá þessu í umræðu á Reddit. Þar sagði hann að unnusta hans hafi slitið sambandinu eftir að niðurstöður DNA-rannsóknarinnar lágu fyrir og hún sá hver var meðal forfeðra hans. Hann sagði að hún hafi ekki getað tekist á við hið skuggalega fjölskylduleyndarmál.
„Fyrir um mánuði ákváðum ég og unnusta mín að það gæti verið skemmtilegt að láta gera DNA-rannsókn, eins og Ancestry.com býður upp á, til að fræðast meira um ættartré okkar. Maður fær mikið af upplýsingum og það tók smá tíma að fara yfir þær. Við skemmtum okkur við þetta en þegar ég komst að svolitlu um einn forfeðra minna varð það til að ég missti unnustuna. Það voru nokkur nöfn á ættartrénu sem ég kannaðist ekki við en eftir smá rannsóknarvinnu kom í ljós að einn forfeðra minna var frægur raðmorðingi.“
Skrifaði maðurinn. Hann sagði jafnframt að þau hafi reynt sitt besta til að láta þetta ekki hafa áhrif á sig en unnustunni hafi augljóslega verið illa brugðið yfir þessu. Hann sagðist þó hafa talið að hún myndi komast yfir þetta á endanum en því miður hafði hann rangt fyrir sér.
„Hún hætti með mér því hún gat ekki tekist á við þá staðreynd að ég er skyldur raðmorðingja. Hún sagðist elska mig mjög mikið en sagði að sú staðreynd að í æðum mér renni sama blóð og í svona miklu illmenni hafi orðið til að hún líti mig öðrum augum.“
