Tæplega tveggja og hálfs mínútu löng fasteignaauglýsing hefur svo sannarlega gert allt vitlaust á samfélagsmiðlum undanfarna daga. Fasteignasalinn, sem lét gera auglýsinguna, hafði engan grun um að hún myndi vekja svona mikla athygli og hvað þá umtal. En auglýsingin er að sumra mati þannig að það er eiginlega erfitt að muna að það sé verið að reyna að selja fasteign með henni því athyglin beinist að allt öðru.

Sumir hafa líkt auglýsingunni við „50 Shades of Gray“ og margir eiga erfitt með að ákveða hvort þeir elska auglýsinguna eða hata. Í henni sést par dansa í gegnum hús í Sydney í Ástralíu og það er einmitt parið sem stelur athyglinni. The Guardian skýrir frá þessu.

Eins og sjá má í auglýsingunni hér fyrir neðan þá byrjar hún með að dansari, karlmaður, stígur út úr sportbíl sínum og fer inn í hús þar sem kona bíður hans. Á þeim tíma sem auglýsingin varir ná þau að komast inn í eldhús, synda aðeins í sundlaug hússins, veltast um í sófanum og fara upp í rúm. Auk þess taka þau stökk sem líkjast helst einhverju úr kvikmyndinni Dirty Dancing.

Á samfélagsmiðlum hefur fólk gert grín að auglýsingunni en aðrir lofsama hana. En fólki gengur illa að komast að niðurstöðu um hvort hér sé um bestu eða verstu fasteignaaulýsingu sögunnar að ræða.

Fasteignasalan LJ Hooker, sem lét gera auglýsinguna, hefur fjarlægt hana af vefsíðum sínum og segir í yfirlýsingu að fyrirtækið leiti alltaf nýrra leiða í markaðssetningu en hér hafi verið skotið yfir markið.