Skoski leikarinn Bradley Welsh, sem meðal annars lék í Trainspotting 2, var skotinn til bana í heimaborg sinni, Edinborg, í morgun.
Welsh var líklega þekktari sem boxari en leikari á Bretlandseyjum. Hann var atvinnumaður um tíma og ABA-meistari í sínum þyngdarflokki. Welsh lék glæpamanninn Doyle í Trainspotting 2 sem kom út árið 2017 en hann hafði einnig komið fram í öðrum minni hlutverkum áður, til dæmis Danny Dyer‘s Deadliest Men.
Welsh fannst látinn í stigahúsi húss í Edinborg en þar átti Welsh hnefaleikaklúbb. Hann hafði verið skotinn og rannskar lögregla andlát hans sem morð. Lögregla hefur þó veitt fáar upplýsingar þessu til viðbótar.
Welsh átti um margt merkilega sögu en hann var ungur þegar hann leiddist inn á braut afbrota. Hann sat meðal annars inni fyrir rán. Welsh sagði í viðtölum síðar að boxið hafi hjálpað honum á rétta braut og ekki síst hnefaleikaklúbburinn sem hann stofnaði, Holyrood Boxing Gym. Þar leiðbeindi hann ungum drengjum og mönnum sem höfðu villst af réttri braut í lífinu.
Irvine Welsh, höfundur bókarinnar Trainspotting, sem fyrsta myndin var byggð á, þekkti vel til Welsh. Hann minntist hans á samfélagsmiðlum í dag. „Nú kveð ég ótrúlegan og fallegan vin. Takk fyrir að gera mig að betri manneskju og hjálpa mér að sjá heiminn í jákvæðara ljósi.“
Hér að neðan má sjá Welsh í Trainspotting 2:
