Á þriðjudaginn skildu þyrstir Norðmenn, áfengisþyrstir, eftir sig sviðna jörð í verslun Systembolaget í Strømstad. Áfengi er dýrt í Noregi og algengt er að Norðmenn bregði sér yfir landamærin til frændfólksins í Svíþjóð og kaupi áfengi þar en verðið þar er töluvert lægra.

Systembolaget er einokunarverslun sænska ríkisins á áfengi, svipað og Vínbúðirnar hér á landi.

Þegar Magnus Schaft, frá Noregi, kom í verslun Systembolaget í Strømstad síðdegis á þriðjudaginn var mikið að gera þar. Varla var hægt að fá bílastæði við verslunina og mikið var af fólki inni. Í samtali við Norska ríkisútvarpið sagði hann að starfsfólkið hafi reynt að fylla á hillur en margar vörur hafi einfaldlega verið uppseldar. Það hafi verið eins og viðskiptavinirnir hafi orðið fleiri þennan dag en reiknað var með.

Hann sagði að það hafi aðallega verið bjór og líkkjörar auk snafsa sem Norðmennirnir höfðu kastað sér á. Þá var einnig lítið til af rósavínum og víni í stærri umbúðum, eins og rauðvíni í kössum.

Það er svo sem ekkert einsdæmi að Norðmenn versli svona mikið í þessari áfengisverslun eða öðrum áfengisverslunum í Svíþjóð sem eru nærri norsku landamærunum. Undanfarin fjögur ár hefur mikil söluaukning orðið í verslunum Systembolaget nærri norsku landamærunum. Systembolaget vill þó ekki skýra frá hversu margir Norðmenn versla hjá fyrirtækinu.