Læknirinn, Patrick Pritzwalk-Stegmann, lét hinn 24 ára gamla Joseph Esmaili heyra það þegar hinn síðarnefndi kveikti sér í sígarettu fyrir utan sjúkrahúsið í Melbourne í Ástralíu árið 2017. Afskiptasemi Patricks fór fyrir brjóstið á Joseph sem veitti lækninum eitt hnefahögg í anndlitið. Patrick lést af völdum höggsins.
Árið 2014 tóku í gildi ný lög í Viktoríu-fylki í Ástralíu sem var einmitt ætlað að taka á árásum sem þessum. Hver sá sem veldur dauða annars manns með því að veita honum höfuðhögg, til dæmis hnefahögg eins og í þessu tilfelli, fær sjálfkrafa tíu ára dóm að lágmarki. Niðurstaða dómstólsins í Melbourne var einmitt tíu ára fangelsi yfir Joseph og sex mánuðir til viðbótar. Joseph þarf að sitja í fangelsi næsta áratuginn hið minnsta.
Lögunum sem tóku gildi árið 2014 er ætlað að taka á árásum, sem kannski virðast sakleysislegar, en hafa á tíðum skelfilegar afleiðingar. Áður en lögin tóku gildi þóttu menn sleppa nokkuð vel því lögmenn áttu tiltölulega auðvelt með að fara rök fyrir því að fall, í kjölfar höggs, hafi valdið meiðslunum eða dauðanum. Lögin nú gera ekki greinarmun á höggi og afleiðingum þess, til dæmis ef viðkomandi dettur á steinsteypta stéttina. Högg sem veldur dauða gerir það að verkum að árásarmaðurinn fær tíu ára fangelsisdóm.
Patrick meðhöndlaði meðal annars sjúklinga með lungnakrabbamein á ferli sínum sem læknir. Þegar dómur var kveðinn upp í málinu sagði Joseph að hann sæi eftir gjörðum sínum, en höggið hefði ekki verið þungt. Hann þótti þó ekki eiga sér miklar málsbætur í málinu enda árásin tilefnislaus.
