Íbúar í San Francisco eru margir búnir að fá sig fullsadda af miður geðslegu vandamáli í borginni. Árið 2011 bárust borgaryfirvöldum 5.500 tilkynningar um skít, bæði úr dýrum og mönnum, á götum borgarinnar. Árið 2018 voru tilkynningarnar orðnar 28 þúsund.
Þetta kemur fram í frétt Business Insider sem fjallar um þetta óvenjulega vandamál. Tekið er fram að þetta séu bara tölur um fjölda tilkynninga og því ekki útilokað að vandinn sé enn meiri.
San Francisco er ein ríkasta borg Bandaríkjanna, meðaltekjur á hvern íbúa þar eru með þeim hæstu í Bandaríkjunum, en þrátt fyrir það eru aðeins 25 almenningssalerni í borginni. Þetta er heldur lítið, ekki síst í ljósi þess að um 7,500 eru heimilislausir í borginni. Á degi hverjum fá yfirvöld um 75 símtöl að meðaltali frá borgurum sem tilkynna skít eða saur á götum borgarinnar.
Matt Haney, fulltrúi í borgarstjórin San Francisco, vill taka á þessum vanda og fjölga almenningssalernum til muna. Er vandinn meiri í sumum hverfum en öðrum, til dæmis í Tenderloin-hverfinu í miðborginni. Þar er glæpatíðni tiltölulega há og fátækt mikil.