Yfirvöld á Sri Lanka tóku þá ákvörðun eftir voðaverkin í gærmorgun að loka tímabundið fyrir alla samskiptamiðla. Staðfest var í morgun að 290 væru látnir eftir að sjálfsmorðssprengjuárásir voru gerðar í sex kirkjum og hótelum í landinu.
Ástæða þess að lokað var fyrir samfélagsmiðla var, að sögn yfirvalda, að létta á spennu og takmarka útbreiðslu sögusagna og falsfrétta. Eftir árásirnar voru vinsælar vefsíður eins og Facebook, YouTube, WhatsApp, Instagram, Snapchat og Viber ekki lengur aðgengilegar.
Varnarmálaráðuneyti Sri Lanka segir að lokuninni verði aflétt þegar yfirvöld hafa lokið rannsókn sinni á sprengingunni. NetBlocks, eftirlitsaðili sem fylgist með lokunum af þessu tagi, segir að sagan sýni að aðgangstakmarkanir beri sjaldnast tilætlaðan árangur.
Alp Toker, framkvæmdastjóri NetBlocks, segir að lokanir sem þessar geti valdið ótta hjá almenningi. Upplýsingar leiti einfaldlega í annan farveg.
Í morgun tilkynntu yfirvöld einnig um útgöngubann sem á að gilda frá átta að morgni til klukkan fjögur aðfaranótt þriðjudags.
