Ljóð eftir Christian Schilcher, varaborgarstjóra í Braunau am Inn í Austurríki hefur valdið miklu fjaðrafoki þar í landi undanfarið. Ljóðið var birt í dagblaði FPÖ, Frelsisflokksins sem er öfgahægriflokkur, í Braunau am Inn en þar fæddist Adolf Hitler. Í ljóðinu líkir Schilcher flóttamönnum við rottur og biður þá að aðlagast austurrísku samfélagi eða flýta sér í burtu að öðrum kosti.

Ljóðið ber titilinn Borgarrottan. Sebastian Kurz, kanslari Austurríkis, hefur fordæmt Schilcher fyrir ljóðið en FPÖ myndar ríkisstjórn með ÖVP flokki Kurz en ÖVP er íhaldsflokkur. BBC skýrir frá þessu. Kurz hefur krafist þess að FPÖ fordæmi ljóðið og taki afstöðu gegn því.

Austrian Press Agency hefur eftir Kurz að ljóðið sé „viðbjóðslegt, ómannlegt og mjög rasískt“ og eigi ekkert erindi í Austurríki.

Auk þess að segja flóttamönnum og innflytjendum að aðlagast austurrísku samfélagi segir í ljóðinu að það að blanda ólíkum menningarheimum saman sé „eins og að eyðileggja þá“.

Schilcher sagði um helgina að hann hafi ekki ætlað sér að „móðga eða meiða neinn“ með ljóðinu. Hann baðst afsökunar á að hafa ekki virt „þær sögulegu byrðar“ sem samlíking á rottum og fólki er og sagði að ljóðið ætti að lýsa breytingum „sem ég og aðrir gagnrýnum réttilega“ út frá sjónarhóli rottu.