Ben Nicholson, 43 ára breskur lögfræðingur, varð fyrir þeirri ömurlegu lífsreynslu að missa eiginkonu sína og tvö börn í hryðjuverkunum á Sri Lanka á páskadag. Eiginkona hans, Anita og börnin Alex og Annabel, 14 og 11, ára, voru að borða morgunmatinn þegar tveir menn gengu inn í morgunverðarsalinn og sprengdu sig í loft upp.

Í morgun var staðfest að 310 væru látnir eftir hörmungarnar á páskadag en ekki er útilokað að tala látinna muni halda áfram að hækka í dag. Margir eru illa slasaðir á sjúkrahúsi.

Ben sást ganga um götur Colombo, alblóðugur, eftir sprengjuárásina þar sem hann leitaði upplýsinga um afdrif fjölskyldu sinnar. Ben hefur nú tjáð sig um atburðina á páskadag og segist hann geta huggað sig við það að eiginkona hans og börn hafi ekki þjáðst heldur látist að líkindum samstundis.

Fjölskyldan var í fríi á Sri Lanka en þegar sprengjumennirnir gengu inn var fjölskyldan að borða morgunmat á annarri hæð hótelsins í Colombo.

Í yfirlýsingu sem Ben sendi frá sér minnist hann eiginkonu sinnar og barna með hlýjum orðum. „Anna var stórkostleg eiginkona og kærleiksrík móðir tveggja barna okkar,“ sagði hann og bætti við að börnum þeirra hafi beðið björt framtíð. „Við vorum svo stolt af þeim og hlökkuðum mikið til að sjá þau vaxa úr grasi.“

Ben var ekki inni í morgunverðarsalnum þegar árásin var gerð en hann meiddist þó örlítið þegar hann fékk sprengjubrot í sig. Breskir fjölmiðlar fjölluðu á páskadag um blóðugan ferðamann sem sást ganga um götur borgarinnar í leit að fjölskyldu sinni. Umræddur maður var Ben.

Eiginkona Bens var einnig lögfræðingur en þau störfuðu bæði í Singapúr.

Talið er að öfgasamtökin Nathonal Towheed Jamaath (NTJ) hafi staðið fyrir hryðjuverkaárásunum.