Bob Iger, stjórnarformaður Disney, fékk 80 prósenta launahækkun á síðasta ári. Laun hans það ár voru hvorki meira né minna en 65,6 milljónir Bandaríkjadala, eða tæpir átta milljarðar króna.
Ekki eru allir á eitt sáttir við þetta gríðarlega launaskrið en í hópi þeirra er Abigail Disney. Abigail er barnabarn Roy Disney sem ásamt bróður sínum, Walt, stofnaði þetta sögufræga fyrirtæki árið 1923.
Abigail, sem hefur meðal annars starfað í kvikmyndaiðnaðinum, hefur lengi látið sig réttindi starfsfólks varða og samfélagslega ábyrgð fyrirtækja. Hún segist þekkja dæmi um starfsfólk Disney-skemmtigarðsins í Kaliforníu sem hafi þurft að þola ákveðnar skerðingar að undanförnu. Þarna starfi einstaklingar sem eiga erfitt með að ná endum saman.
Abigail benti á það í samtali við bandaríska fjölmiðla á dögunum að bónusgreiðslur sem æðstu stjórnendur Disney fengu á síðasta ári hefðu getað dugað til að hækka laun hins almenna starfsmanns um 15 prósent.
Walt Disney-fyrirtækið brást við þessari gagnrýni Abigail með yfirlýsingu þar sem fram kom að byrjunarlaun starfsmanna Disney séu fimmtán Bandaríkjadalir á tímann, eða 1.812 krónur. Það sé meira en lög um lágmarkslaun kveða á um.