Flugmenn hjá skandinavíska flugfélaginu SAS hófu verkfallsaðgerðir í morgun eftir að samningaviðræður á milli þeirra og flugfélagsins fóru út um þúfur. Verkfallið hefur víðtæk áhrif og hefur 673 flugferðum verið aflýst í dag. Þar á meðal eru flug félagsins frá Kaupmannhöfn og Osló til Keflavíkur nú í morgun.

Danska ríkisútvarpið skýrir frá þessu. Fram kemur að verkfallið hafi áhrif á 72.000 farþega. 1.500 flugmenn eru í verkfalli. Haft er eftir Henrik Thyregod, formanni danska stéttarfélags flugmanna SAS, að mikið beri í milli samningsaðila. Hann vísaði fullyrðingum SAS, um að kröfur flugmanna séu ósanngjarnar, á bug.

Hann sagði að samningaviðræður hafi staðið yfir undanfarinn mánuð og snúist um vinnuskilyrði flugmanna. Þeir vilji fá sömu góðu vinnuskilyrði og flugmenn annarra lággjaldaflugfélaga búa við þar sem vinnuáætlunin sé fyrirsjáanleg. Þeir fljúgi í fimm daga og eigi síðan fjögurra daga frí samkvæmt föstu vaktkerfi. Hjá SAS sé það hins vegar þannig að nær allir flugmenn félagsins vinni eftir kerfi sem hefur í för með sér að þeir vita ekki hvenær þeir eiga frí. Þeir fái vakttöflu 14 dögum áður en hún tekur gildi og vinni allt að sjö helgar í röð.