Enn fer spennan við Persaflóa vaxandi en deilur Íran og Bandaríkjanna virðast vera að harðna. Fyrr í vikunni tilkynntu bandarísk stjórnvöld að flugmóðurskipið USS Abraham Lincoln haldi nú til Persaflóa ásamt flotadeild sinni vegna óskilgreindrar ógnar sem stafi af Íran. Í gær bættust síðan B52 sprengjuflugvélar við viðbúnað Bandaríkjanna í heimshlutanum en þær lentu í stórri bandarískri herstöð í Katar.

Bandaríski flugherinn birti í nótt myndir sem voru teknar af vélunum þegar þær lentu í Katar. Fleiri vélar þessarar tegundar lentu síðan á flugvöllum í Suðvestur-Asíu á miðvikudaginn sagði talsmaður flughersins og skýrði ekki nánar frá í hvaða landi. Bandaríkjaher hefur að undanförnu sagt að Al Dhafra og Al Udeid herstöðvar hans í Sameinuðu arabísku furstadæmunum séu í „Suðvestur-Asíu“.

Vélarnar sem komu til Katar í gær eru frá herstöð í Louisiana.

Efnahagur Íran á nú í vök að verjast vegna viðskiptaþvingana Bandaríkjanna og á landið erfitt með að selja olíu úr landi vegna þess. Þetta hefur í för með sér efnahagslegar þrengingar og verðbólgu.