Fimmtán kindur hafa verið skráðar til náms í grunnskólanum í Jules-Ferry, sem er við fætur Frönsku Alpanna, en tæplega 4.000 manns búa í bænum. Þar eins og víðar í dreifbýli fækkar fólki og þar með börnum. Þetta þýðir að rætt hefur verið um að fækka kennslustundum í skólanum og jafnvel loka honum á endanum.

261 barn er í skólanum og nú eru 15 kindur komnar í hópinn. Þetta er auðvitað táknræn aðgerð sem er aðallega ætlað að vekja athygli á slæmri stöðu skólans. Michel Girerd, fjárbóndi, skráði kindurnar í skólann og mætti með þær til innskráningar og naut aðstoðar fjárhunda sinna við að hafa stjórn á hópnum.

Sky segir að faðir eins skólabarnsins hafi sagt Le Parisien að því miður gengi menntakerfið í Frakklandi aðeins út á tölur og því væri vonast til að þessi aukning í nemendafjölda muni bæta stöðu skólans.

11 bekkir eru í skólanum en hugmyndir hafa verið uppi um að fækka þeim í 10. Það hefur í för með sér að meðalfjöldi í hverjum bekk hækkar úr 24 í 26. Ef svo fer þá verður fjöldinn í hverjum bekk meiri en það viðmið sem Emmanuel Macron, forseti, hefur sett fram í menntastefnu sinni.