Bandaríski körfuboltamaðurinn fyrrverandi Dennis Rodman hefur verið kærður til lögreglu fyrir þjófnað. Málið þykir allt hið undarlegasta en Rodman er sakaður um að hafa stolið vörum úr húsnæði jógaseturs á Newport Beach ásamt þremur öðrum.
Jógasetrið sem um ræðir heitir Vibes Hot Yoga og segist eigandinn, Ali Shah, eiga það á upptökum öryggismyndavélar þegar Rodman, ásamt þremur öðrum, kom þar við síðastliðinn þriðjudag og gekk út með vörur að verðmæti rúmlega 400 þúsund krónur. Daginn eftir á Rodman að hafa komið aftur, nú með konu í för, og þau gengið út með nokkurt magn fatnaðar.
Að því er fram kemur í frétt Los Angeles Times er lögreglan að rannsaka málið og hefur enginn verið handtekinn í tengslum við það. Rodman tjáði sig um málið við TMZ um helgina og sagði að eigandinn hafi gefið honum vörurnar. Ljóst er að ekki eru öll kurl komin grafar í málinu.
Rodman þótti býsna litríkur körfuboltamaður á ferli sínum með Detroit Pistons, San Antonio Spurs og Chicago Bulls. Hann vann NBA-deildina fimm sinnum og þótti einn allra besti varnarmaður deildarinnar í mörg ár.
Þess má geta að Rodman fagnar 57 ára afmæli sínu í dag, 13. maí.
