Eftir að hafa verið á flótta undan lögreglunni í 23 ár gaf Wayne Arthur Silsbee, 62 ára, sig fram við lögregluna í Oregon City í Oregon í Bandaríkjunum á föstudaginn. Hann mætti á lögreglustöð og gaf sig fram.

CNN skýrir frá þessu. Silsbee er grunaður um mörg kynferðisbrot gegn barnungum stúlkum á árunum 1995 og 1996. Lögreglan segir að hann hafi brotið gegn stúlkum á aldrinum átta til tíu ára. Hann þekkti þær allar því hann hafði gætt þeirra eða farið með þær á ýmsa viðburði.

Hann á yfir höfði sér margar ákærur fyrir gróf kynferðisbrot.

Fyrstu kærurnar á hendur honum bárust í júlí 1996 og í september það ár lýsti alríkislögreglan FBI eftir honum en þá var hann lagður á flótta. Ekki tókst að hafa hendur í hári hans fyrr en á föstudaginn þegar hann gaf sig fram. Ekki er ljóst af hverju hann ákvað að gefa sig fram.