Þrjátíu og sex ára Bandaríkjamaður sem gegnt hefur stöðu aðstoðarprófessors við Penn State University var handtekinn um helgina vegna gruns um mannrán.
Maðurinn sem um ræðir heitir Richard Lomotey og er hann grunaður um að hafa rænt tveimur konum aðfaranótt sunnudags. Richard virðist hafa verið í aukavinnu sem Uber-bílstjóri í Pittsburgh því konurnar höfðu pantað far með Uber og var það Richard sem sótti þær.
Í stað þess að skutla þeim þangað sem þær vildu fara fór Richard með þær á afvikinn stað, sagði þeim að honum þætti þær aðlaðandi. Að svo búnu reyndi hann að læsa bifreiðinni og sagði konunum „að þær væru ekki að fara neitt.“
Í frétt Pittsburgh Post-Gazette kemur fram að konurnar hafi komist úr bílnum og haft samband við lögreglu. Lögreglu tókst svo að finna Richard í gegnum skráningarkerfi Uber. Hann hefur nú verið kærður fyrir mannrán og áreitni og gæti átt fangelsisdóm yfir höfði sér.
