Eiginkona og faðir þýska ökuþórsins Michael Schumacher munu opna sig í nýrri heimildarmynd sem frumsýnd verður á næstunni. Sýnishorn úr myndinni verður sýnt á kvikmyndahátíðinni í Cannes sem hefst í þessari viku.
Schumacher hlaut alvarlega höfuðáverka í skíðaslysi í desember 2013 og var honum haldið sofandi mánuðum saman eftir slysið. Lítið hefur frést af Schumacher eftir slysið og hefur fjölskyldan lítið sem ekkert viljað tjá sig um heilsu hans eða líðan.
Myndin, sem heitir einfaldlega Schumacher, mun væntanlega koma í kvikmyndahús í desember næstkomandi og er myndin gerð í samvinnu við eiginkonu Michaels, Corinnu, og föður hans. Þau eru bæði sögð munu koma fram í myndinni.
Í myndinni verður farið yfir magnaðan feril Michaels sem er margfaldur heimsmeistari í Formúlu 1. Ekki þykir loku fyrir það skotið að einhverju ljósi verði varpað á hið hræðilega slys árið 2013 en Schumacher hefur ekki sést opinberlega síðan. Ljóst er að margir bíða myndarinnar með eftirvæntingu, ekki síst aðdáendur ökuþórsins sem eru fjölmargir.
Michael passaði ávallt vel upp á að halda einkalífi sínu fyrir utan sviðsljós fjölmiðla og ákvað eiginkona hans, Corinna, að virða þá ósk eiginmannsins eftir slysið.