Rætt hefur verið um að fækkun skordýra geti leitt til þess að færri plöntur frjóvgist og minni fæða verði fyrir dýr sem lifa á skordýrum. Í versta falli geti þetta gert okkur mönnunum erfitt fyrir við að verða okkur úti um ávexti, ber og jafnvel ákveðin dýr sem við borðum.
Niðurstöður rannsókna benda til að fiðrildi, býflugur, geitungar, maurar og bjöllur fari sérstaklega illa út úr þessu öllu. Þumalfingursregla er að þeim mun háðari sem skordýrategund er einni plöntu þeim mun verr fer hún út úr þessari þróun. Helstu ástæðurnar fyrir þessu ástandi hjá skordýrunum, er samkvæmt niðurstöðum rannsóknar frá því í apríl, skortur á landrými, mengun, vírusar og nýjar og ágengar tegundir auk loftslagsbreytinga.
En það eru ekki allir vísindamenn sem telja að ástandið verði svona alvarlegt ef miða má við umfjöllun Videnskab.dk. Rasmus Ejrnæs, hjá Árósaháskóla, segir að margar þeirra rannsókna sem gerðar hafa verið séu ekki nægilega vel gerðar því ekki liggi nægilega góð gögn að baki þeim. Þó sé ljóst að á sumum svæðum eigi margar skordýrategundir í vök að verjast en ekki sé hægt að alhæfa að þetta eigi við allsstaðar.
Hann segir enga ástæðu til að óttast að skyndilega fáum við hvorki ávexti né ber eða að plöntur og dýr drepist í miklum mæli og skilji eftir sviðna og illa á sig komna jörð. Mikið þurfi til til að vistkerfi hrynji. Þörf sé á fleiri og betri rannsóknum áður en hægt sé að segja til um afleiðingarnar fyrir náttúruna og mannkynið.