Kynlíf er best ef það er stundað í heilögu hjónabandi og guð skapaði heiminn með tveimur kynjum, við erum sköpuð sem karl eða kona. Þetta er megininntakið í nýju og umfangsmiklu kennsluefni í kynfræðslu, fyrir grunnskóla, sem nokkur kristileg samtök í Danmörku hafa látið gera.

Öllum grunnskólum er frjálst að nota kennsluefnið en í fyrstu er markhópurinn kristilegir einkaskólar. Í grunnskólum er nú aðallega notað kennsluefni frá samtökunum Sex & Samfund og eru þau ekki par hrifin af hinu kristilega kennsluefni. Það er talið veita þrönga sýn á kynlíf og kynin og boði að aðeins tvö kyn og eitt fjölskylduform séu eðlileg. Börn og ungmenni sem passa ekki inn í þessi trúarlega skilgreindu norm eigi á hættu að finnast þau vera óeðlileg.

Gitte Rasmussen, talskona hinna kristilegu Indre Mission samtaka, sagði í samtali við Jótlandspóstinn að í nýja kennsluefninu sé börnunum veitt öryggi með því að höfundar þori að nefna að aðeins séu til tvö kyn. Að guð hafi skapað okkur sem karl og konu. Gengið sé út frá boðskap bilbíunnar um að kynin séu bara tvö.

Aðspurð um af hverju kennsluefnið segi að rangt sé að lifa sem samkynhneigð manneskja sagði Gitte að það sé vitað að til sé fólk sem laðist að fólki af sama kyni og að kristilegu samtökin beri mikla virðingu fyrir fólki sem þarf að glíma við þessa áskorun. En samt sem áður sé gengið út frá boðskap biblíunnar um að karl og kona eigi að verða eitt og þar með mynda hornstein fjölskyldunnar.