Persflóa og ástandinu þar er oft líkt við púðurtunnu enda þarf lítið út af að bera til að allt fari í bál og brand þar. Ólíkir hópar takast þar á og fjandskapurinn er mikill.
Þrátt fyrir að ekki hafi verið skýrt opinberlega frá hver eða hverjir stóðu að baki skemmdarverkunum tengdu margir þau strax við aðvaranir frá bandarískum yfirvöldum um að Íran eða hópar hliðhollir Íran hefðu i hyggju að ráðast gegn bandarískum hagsmunum á svæðinu. Bandaríkin hafa varað sérstaklega við ógnum sem steðja að kaupskipum og olíuskipum og olíuvinnslusvæðum við Persaflóa.
Abdul Latif al-Sajani, hjá samvinnuráði Persaflóaríkja, sagði í gær að skemmdarverkin í gær muni auka enn frekar á spennu og átök á svæðinu.
Um helgina bárust fregnir af fleiri skemmdarverkum, líbönsk útvarpsstöð sagði þá að sprenging hefði orðið í höfninni í Fujairah, sem er eitt Sameinuðu arabísku furstadæmanna, en þessu var vísað á bug af stjórnvöldum í Sameinuðu arabísku furstadæmunum. Það eru Hizbollah-samtökin sem reka umrædda útvarpsstöð en Íranir eru helstu stuðningsmenn Hizbollah.
Undir deilum Bandaríkjanna og Íran kraumar síðan valdabarátta á milli Íran og erkifjendanna í Sádi-Arabíu. Sameinuðu arabísku furstadæmin eru síðan bandamenn Sádi-Araba.
Sérfræðingar, hugveitur og stjórnmálamenn í Bandaríkjunum og Evrópu eru nú farnir að ræða af alvöru að hætta sé á að púðurtunnan við Persaflóa springi og stríð skelli á. Haft hefur verið á orði að staðan nú sé sú hættulegasta síðan Bandaríkin réðust á Írak 2003. Aðrir líkja ástandinu við aðdraganda stríðsins á milli Íran og Íraks 1988. Bandaríkin hafa aukið viðbúnað sinn við Persaflóa að undanförnu og hafa til dæmis sent flugmóðurskipið USS Abraham Lincoln og flotadeild þess á svæðið sem og B52 sprengjuflugvélar.
Volker Perthes, forstjóri þýsku hugveitunnar Stiftung Wissenschaft und Politik, sagði í samtali við Der Spiegel að átakalínurnar á svæðinu væru að harðna. Um sé að ræða flókna flækju deilna og alltof margra áhættusækna aðila sem ræða ekki saman.
