Meðfylgjandi myndband sýnir svo ekki verður um villst að slysin eru fljót að gerast. Síðastliðinn sunnudag var rafvirkinn Joshua Aspey heima hjá sér í Somerset á Englandi að gefa hundunum sínum ost.

Skyndilega sá Joshua að ekki var allt með felldu enda stóð ostbiti í tíkinni Sally sem er af tegundinni Jack Russell. Eins og myndbandið ber með sér brást Joshua skjótt við og kom tíkinni til bjargar. Joshua er fyrrverandi gæslumaður á sundstað og því kunni hann réttu handtökin.

Myndbandið náðist á eftirlitsmyndavél sem er á heimili Joshua. Hann segir við breska fjölmiðla að hann hafi verið fljótur að átta sig á því að Sally ætti erfitt með að anda.

Hann viðurkennir að honum hafi brugðið enda erfitt að horfa upp á hundinn sinn í þessum aðstæðum. „Ég ólst upp með þeim og eru hluti af fjölskyldunni,“ segir hann en Sally er tíu ára gömul.

Þess má geta að Sally varð ekki meint af og er við mjög góða heilsu í dag.