Eins og DV skýrði frá í gær fundust lík þriggja, eins karls og konu, á gistiheimili í Passau í Bæjaralandi á laugardaginn. Örvar úr lásboga voru í öllum líkunum. Ekki er enn vitað hvort örvarnar urðu fólkinu að bana en niðurstöðu krufningar er beðið. En málið tók nýja og óvænta stefnu í gær því þá fann lögreglan tvö kvenmannslík til viðbótar og telur að málið tengist málinu í Passau.
Líkin fundust í íbúð í Wittingen í Niedersachsen. Íbúðin er í eigu eins hinna látnu í Passau. Lögreglan hefur ekki viljað skýra frá hvað varð konunum að bana en segir að „ekki hafi verið um sjálfsvíg að ræða“.
Lögreglan er nú að rannsaka hvaða tengsl voru á milli fórnarlambanna. Ekki er enn búið að bera kennsl á konurnar sem fundust í gær.