Fréttir þess efnis að vinsæll breskur sjónvarpsþáttur, The Jeremy Kyle Show, hafi verið tekinn af dagskrá eftir dauðsfall þátttakanda í þættinum vöktu talsverða athygli í gær.

Þættirnir hafa verið á dagskrá frá árinu 2005 en í þeim koma fram einstaklingar sem eiga í ýmsum deilum. Er það hlutverk Kyle að reyna að miðla málum og koma þeim í sáttafarveg.

Maðurinn sem lést skömmu eftir að umræddur þáttur var tekinn upp á dögunum hét Steven Dymond og var 62 ára. Hann hafði greinst með þunglyndi fyrir þremur mánuðum og kom fram í þættinum ásamt kærustu sinni, Jane Callaghan. J

Jane og Steven höfðu verið sundur og saman um nokkra hríð en í umræddum þætti var hann meðal annars spurður út í meint framhjáhald. Hann er sagður hafa gengist undir lygapróf í þættinum, próf sem hann féll á, og í kjölfarið upplifað „niðurlægingu og illa meðferð“ af áhorfendum sem voru í salnum þegar þátturinn var tekinn upp. Þá kom upp úr krafsinu að handtökuskipum væri í gildi á hendur honum vegna gamalla skulda.

Viku eftir að þátturinn var tekinn upp fannst Steven látinn og bendir allt til þess að hann hafi svipt sig lífi.

Í samtali við Mail Online segir Jane að Steven hafi verið staðráðinn í að mæta í þáttinn og gera hreint fyrir sínum dyrum. Læknar hafi treyst honum til þess en eftir þáttinn hafi andlegri heilsu hans tekið að hraka að nýju.

Til stóð að sýna þáttinn í gærmorgun en hann var tekinn af dagskrá um leið og í ljós kom að Steven væri látinn. ITV, framleiðandi þáttarins, tilkynnti um leið að fleiri þættir yrðu ekki teknir upp að sinni og þá voru þættir sem þegar hafa verið sýndir fjarlægðir af heimasíðu stöðvarinnar.