Fimm létust í gær þegar tvær sjóflugvélar rákust saman í Alaska í Bandaríkjunum. Margir slösuðust alvarlega og eins er saknað.

Samkvæmt frétt Anchorage Daily News voru flugvélarnar að flytja farþega úr farþegaskipi til og frá landi þegar þær rákust saman nærri Ketchikan í suðaustanverðu Alaska. 16 voru um borð í flugvélunum.

Farþegarnir voru allir farþegar á skemmtiferðaskipinu Royal Princess. Slysið varð um klukkan 15 að staðartíma.

Bandaríska strandgæslan sendi strax þyrlur og skip á slysstað. 10 farþegum var bjargað upp í nærstatt skip. Þrír þeirra eru alvarlega slasaðir.

Ekki er vitað af hverju vélarnar rákust saman en slæmt veður var á slysstað og gæti það hafa átt sinn þátt í slysinu.