Netverslunin ASOS, ein sú stærsta sinnar tegundar í heiminum, hefur ákveðið að skera upp herör gegn einstaklingum sem stunda það að kaupa fatnað og skila honum ítrekað aftur. Er þessu meðal annars beint að svokölluðum áhrifavöldum sem sitja fyrir í fötunum og skila þeim aftur.
Í frétt Mail Online kemur fram að þeir sem þetta stunda séu settir á svartan lista hjá fyrirtækinu. Raunar hafa fleiri netverslanir en ASOS tekið upp á þessu, að því er segir í fréttinni, enda kostnaður fyrirtækjanna við að senda og taka á móti sendingum talsverður. Talið er að kostnaður netverslana vegna þessa hlaupi á milljörðum króna á hverju ári.
Barcleycard gerði könnun á þessu í Bretlandi þar sem fram kom að fimmtungur netverslana með fatnað hafi hert reglur hvað þetta varðar á síðustu tólf mánuðum. Þá leiðir könnunin í ljós að þrjú af hverjum tíu ungmennum panti og kaupi föt af netverslunum á borð við ASOS án þess að ætla sér að eiga þau.
